CDO-Banner

BOSS abri karong weekend aron pagproseso sa business permit

By Ian Fuentes / photo by Jay Arancon

ABRI ang Business One Stop Shop kon BOSS sa City Hall karong adlaw’ng Sabado ug Dominggo gikan alas-8:00 sa buntag hangtud ala-5:00 sa hapon aron pagproseso sa business permit.

Kini ang gipahibalo sabuhatan sa mamahandi ning dakbayan sa Cagayan de Oro ubos ni City Treasurer Jasmin Maagad nunot sa business permit renewal karong tuiga.

Extended usab ang ‘working hours’ sa City Finance Department hangtud ala-7:00 sa gabii gikan Lunes hangtud Biyernes aron ma-akomodar kadtong mga negosyante nga walay igong panahon pagduso sa ilang business permit, sigun pa ni Maagad.

Subay niini, subling gihangyo ni Maagad ang mga negosyante sa syudad nga pahimuslan ang maong extended working hours aron pag-proseso sa ilang business permit.

Gipasabot sa City Treasurer nga adunay ipahamtang nga 25% surcharge ug 2% penalty matag bulan ngadto sa mga late filers o’ kadtong mapakyas pag-renew human sa deadline karong Enero 20, 2020.

Hinoon, pwede na karon ang online tax billing ug business tax payment nga ma-access sa official website sa dakbayan nga www.cagayandeoro.gov.ph.

Ang online services sa treasurer’s office tipik lang sa mga paningkamot sa administrasyon ni Mayor Oscar Moreno nga mapalig-on pa ang ‘ease of doing business’ sa Cagayan de Oro isip ‘business-friendly city’. business_permit_re.jpg