CDO-Banner

40 porsiyento nga pagkunhod sa basura natala

BISAN pa man sa nagpadayong kampanya ug paningkamot sa Task Force Solid Waste Management nga makab-ot ang kahinlo sa syudad, gikalipay niini nga anaa na sila karon sa 40 porsiyento nga pagkunhod sa basura o waste diversion sa matag adlaw.

Base sa datus sa City Local Environment and Natural Resources Office (Clenro) mokabat sa 506 tons ang makolekta nga basura matag adlaw sa wala pa masugdi ang kampanya sa Solid Waste Management team sa waste segregation diha sa mga kabarangayan.

Matud ni Oliver Egypto, chairman sa Task Force Solid Waste Management, tungod sa pagbaton og mga Materials Recovery Facility (MRF) sa mga barangay gisugdan usab nila ang waste segregation pinaagi sa recycling ug composting.

Dugang ni Egypto 60 porsiyento na sa 80 ka barangay ning syudad ang misanong sa mga nalatid sa Republic Act 9003 o Ecological Solid Waste Management Act of 2000 ilabina ang pagbaton og kaugalingong MRF.

Kahinumdoman nga una nang nagpalabang ang syudad og City Ordinance 8975-2003 o Waste Segregation ordinance sa matag barangay.

Base sa Section 3(a) sa maong ordinansa, ang solid waste segregation magsumikad sa kabalayan, business/commercial establishments ug agricultural sources samtang nakalatid sa Section 3(b) nga mismo ang barangay maoy magdumala niini ilabina sa compostable, recyclable ug reusable wastes.

Tungod niini gipahinumdoman ug gihagit sa Clenro ug Solid Waste Management Task Force ang matag barangay sa pagtuman niini.###