Gilauman nga makunhoran na ang kakulangon sa panimalay ning syudad pinaagi sa katukoran sa dugang 1,200 condo-type housing units diha sa Klarexville 4 Macaranas Residences Barangay San Simon human kini gisubhan adlaw’ng Huwebes Hunyo 6, 2024.

 

Ang groundbreaking ceremony gipangulohan ni Mayor Rolando `Klarex’ Uy uban sa mga kadagkoan sa Socialized Housing and Finance Corporation (SHFC), Grand Apex Construction, Inc. nga maoy contractor, City Councilors Atty. Edgar Cabanlas, Maria Lourdes Gaane, Suzette Magtajas-Daba, Jay Pascual, Roger Abaday, James Judith ug Bernie Esparcia, City Housing and Urban Development Department (CHUDD) Head Atty. Samuel Rollo, city hall department managers, barangay officials, ug mga opisyales sa Klarexville 4 Homeowners Association.

 

Sa iyang mensahe gipasalamatan ni Mayor Klarex ang SHFC nga hugot nga nagsuporta sa housing program sa syudad ug labaw sa tanan ang 4PH program sa national nga kagamhanan pinaagi sa Department of Human Settlement and Urban Development (DHSUD).

 

“Pinaagi sa 4PH program hinay-hinay nga masulbad ang problema sa housing,” dugang ni Mayor Klarex.

 

Gipasalamatan usab sa mayor ang CHUDD ug ang 20th City Council pinangulohan ni Vice Mayor Jocelyn Rodriguez ug tanang stakeholders nga kanunay nagpakabana sa housing program sa syudad aron maatiman ang katawhan. (ALR/CIO/Photos by Roel Felicitas/CIO)