GARBO ug gikalipay sa kagamhanang lokal ubos sa administrasyon ni Mayor Rolando “Klarex” Uy nga nakakuha og ‘green light’ sa tanang aspeto sa Seal of Good Local Governance (SGLG) validation team nga mibisita sa syudad sa milabay’ng bulan.

 

Sa mensahe ni Mayor Klarex karong buntag atol sa pagpakayab sa nasudnong bandila, iyang gipasalamatan ang tibuok burukrasya sa city hall ingon man ang ang mga department managers, Vice Mayor Bebot Rodriguez lakip ang 20th city council sa makanunayong suporta ug kooperasyon nga nagmalampuson ang city hall sa paghatag og serbisyo sa katawhan.

 

Dako ang panghinaut ni Mayor Klarex nga masungkit pag-usab ang dungog sa SGLG sa ikaduhang higayon.

 

“Manghinaut ug mag-ampo lang kita nga makuha ang back-to-back nga SGLG sa dakbayan,” matud ni Mayor Klarex.

 

Kahinumdoman nga nasakmit sa Cagayan de Oro sa unang higayon ang SGLG sa tuig 2023 diin nagpakita lamang sa maayo nga pagdumala ug paghatag og serbisyo sa katawhan ning syudad. (ACM/CIO Photos Reynan Baylin)