GIPAHALIPAYAN ni Mayor Rolando 'Klarex' Uy ang nakab-ot nga kalampusan sa buhatan sa City Health Office ubos sa pagpangulo ni City Health Officer Dr. Rachel Dilla atol sa senimanang pagpakayab sa nasudnong bandila sa city hall, Nobyembre 11.

 

Kini human sobra 30 ka pasidungog ang naangkon sa maong buhatan atol sa Harmonize Awarding Ceremony sa Department of Health didto sa Davao City ug laing awarding usab nga gipahigayon sa usa sa mga hotel dinhi sa dakbayan alang sa mga pasidungog nga na dawat gikan sa rehiyonal nga buhatan sa DOH dili lamang dugay.

 

Nasayran gikan ni City Health Officer Dr. Rachel Dilla nga ang maong pasidungog gikan sa regional office, ingon man sa nasyonal nga buhatan sa DOH alang sa nagkadaiyang programa sa nakalabay’ng mga bulan.

 

Gipasalamatan usab ni Dr. Dilla ang mga program coordinators sa ilang buhatan, lakip ang kinatibuk-ang city hall sa pagpanguna ni Mayor Klarex Uy sa suporta sa tanang mga programa niini.

 

Lakip sa nakuha sa City Health Office ang mga pasidungog kalabot sa Health Promotion Best Practice on Community Participatory Approach, pag-ila sa mga barangay health workers (BHWs), Home-Based Health Communicators, Nutrition Programs ug daghan pang mga programa nga gipatuman dinhi sa dakbayan. (GB/CIO Photos by Reynan Baylin CIO/ and City Health Office)