Dako ang pasalamat ni City Mayor Rolando 'Klarex' Uy sa buhatan ni City Councilor Suzette Magtajas-Daba ug City Scholarships Office (CSO) Head Richel Petalcurin-Dahay sa ilang pagpatin-aw sa mga isyu may kalabotan sa City Scholarship Program, ilabina sa tuition ug allowances sa mga city scholars.

 

Sa pagpakayab sa nasudnong bandila sa city hall Lunes sa buntag, gipasabot ni Mayor Uy nga adunay mga dokumento o’ rekisito nga kinahanglan kompletuhon og isumite sa mga scholars ayha mapagawas ang ilang allowance, apan dili kini pasabot nga na-delatar ang ilang allowances tungod kay walay pundo.

 

Ang CSO naningkamot kanunay nga updated ang pag-release sa allowances sa mga scholars, ilabina kadtong naka-comply na sa pagsumite sa gikinahanglang mga rekisito ug dokumento sama sa ilang grado ug return service compliance.

 

Pinaagi sa hugot nga suporta sa 20th City Council ubos sa pagpangulo ni Bise Mayor Jocelyn ‘Bebot’ Rodriguez, gipadayag ni Mayor Klarex nga magpadayon ang maayong pagserbisyo sa city scholarship program alang sa kaayohan ug masanag nga kaugmaon sa mga kabatan-onan sa Cagayan de Oro. (MS/photo by Reynan Baylin)