SA tinguha nga masunod ang pagpatuman sa suggested retail price (SRP) sa mga imported rice nga gibaligya sa kamerkaduhan, gisugyot sa Cagayan de Oro City Price Coordinating Council (CDO CPCC) nga gipangulohan ni Mayor Rolando `Klarex’ Uy nga ma-reactivate ang Bantay Presyo Task Force sa Department of Agriculture (DA-10).

 

Gipasabot ni CPCC co-chairman Atty. Jose Edgardo Uy nga ang sugyot nahimo human nasuta nga daghan sa mga retailers sa bugas partikular na sa Cogon Market ang wala nisunod sa nauyonan nga presyo sa imported rice diin ibaligya kini sa barato nga presyo.

 

Matud ni Atty. Uy nga niubos ang tariff sa mga imported rice mao nga napugos usab ang mga rice importers sa pagbaligya niini sa ubos nga presyo ngadto sa mga retailers.

 

Gani, niadtong bulan sa Disyembre 2024, nakigtagbo man ang kadagkuan sa DA, CPCC ug CEEBDA sa mga rice retailers sa Cogon Market alang sa maong katuyoan diin mipadayag sa ilang pag-uyon nga ibaligya sa barato ang mga imported rice.

 

Apan, dismayado ang nasangpit nga mga ahensya ug buhatan kay daghan sa mga rice retailers ang wala nagpatuman.

 

Hinuon, malaumon si Atty. Uy nga pinaagi sa pag-reactivate sa Bantay Presyo Task Force sa DA ipatuman sa mga rice retailers ang SRP sa mga imported rice. (ALR/CIO/Photos from CDO-CPCC)