NAKADAWAT og pasidungog ang syudad sa Cagayan de Oro pinaagi sa City Anti-Drug Abuse Council (CADAC) sa administrasyon ni Mayor Rolando `Klarex’ Uy isip Highly-Functional ADAC gikan sa Department of the Interior and Local Government (DILG-X) Huwebes Enero 9, 2024.

 

Ang pasidungog gitunol atol sa Regional Anti-Drug Abuse Council (ADAD) Performance Awards nga gipahigaon sa Mallberry Suites Business Hotel ning syudad.

 

Si Dr. Rhyselle Bernadette Melliza-Descallar, head sa City Anti-Drug Abuse Division – Oro Wellness Center mipasabot nga ang award gihatag ngadto sa City Government CADAC tungod sa sulundon nga paningkamot sa paghimo sa ilang mga katungdanan diha sa pagpatuman sa kampanya sa nasudnong kagamhanan batok sa gidili nga druga.

 

Tumong sa kalihokan nga maila ang talagsaong pasundayag sa mga ADAC sa probinsiya, syudad ug munisipyo nga nakab-ot ang passing mark nga high-functionality kalabot sa implementasyon, monitoring, ug evaluation sa anti-illegal drug activities nga naglangkob sa Audit Year 2024.

 

Si City Administrator Atty. Roy Hilario Raagas, nga maoy mi-representar ni Mayor Klarex, uban ni Dr. Descallar, DILG City Director Edward Bhagwani maoy midawat sa award.

 

Alayon niini, gipasalamatan ni Dr. Descallar ang tanang miyembro sa CADAC, mga partners gikan sa ubang buhatan sa gobiyerno ug non-government organizations, Barangay Anti-Drug Abuse Councils (BADACs) ning syudad, Community-Based Drug Rehabilitation Program (CBDRP) Managers, Responders, ug ubang community leaders ug mga volunteers sa suporta, kooperasyon ug lig-on nga pasalig sa pagtabang aron ipadala ang mensahe sa PAGLAUM sa komunidad. (ALR/CIO/Photos from CADAD – Oro Wellness Center)