Sobra 30 mil ka mga miyembro sa Iglesia ni Cristo (INC) ang magtapok dinhi sa Plaza Divisoria karong Lunes, Enero 13 gikan alas-9:00 sa buntag hangtud alas-4:00 sa hapon alang sa usa ka National Rally for Peace.

 

Gani man, nangandam na ang lokal nga kagamhanan ning syudad aron mahimong hapsay ug malinawon ang nationwide rally human giaprobahan ni Mayor Klarex Uy ang sulat-hangyo sa grupo sa pagpahigayon sa maong kalihukan diha sa Plaza Divisoria.

 

Gani, usa ka coordination meeting ang gipahigayon Biyernes sa hapon nga gitambongan nila ni INC Supervising District Minister Alnorfo A. Jurada, ug CDRRMD officer Nick Jabagat, RTA chief Engr. Nonito Oclarit, CPSD head Engr. Allan Villalba, CLENRO officer Engr. Armen Cuenca, acting city information officer Ian Fuentes ug mga kadagkoan sa Cagayan de Oro City Police Office.

 

Atol sa tigom, gipresentar ang security plan sa COCPO, temporary traffic scheme sa RTA, activation sa Incident Management Team (IMT), paggamit sa Rio de Oro boulevard isip drop off/pick up area, ug pamaagi sa pagpanghipos sa mga basura.

 

Sumala ni Ministro Jurada magsumikad ang ilang mga miyembro gikan sa probinsya sa Bukidnon, syudad sa Gingoog ug Lanao areas, lakip Cagayan de Oro.

 

Dako usab ang posibilidad nga magpatuman ang kapolisan og signal jamming palibot sa Divisoria area panahon sa rally. (CIO/photos by Kim Zaldivar)