Sobra 500 ka tawo ang gibana-banang midagsa sa labing-una nga 'Klarex nga Serbisyo sa Baryo' sa ikaduhang termino ni Mayor Rolando ‘Klarex’ Uy, Hulyo 12, 2025 diha Barangay Balubal ning syudad.

 

Subling gipasabot ni City Administrator Atty. Roy Hilario Raagas ang katuyuan sa KSB matag adlaw’ng Sabado nakasubay sa kasing-kasing ug kalidad nga serbisyo ni Mayor Klarex sa katawhan sa mga kabaranggayan.

 

Nanghinaot usab si Mayor Rolando 'Klarex' Uy nga sama kaniya molungtad usab ang kaikag sa pagserbisyo sa mga kawani sa City Hall ug mga Department Managers sa pagtunol sa programa sa syudad.

 

Lakip sa mga serbisyong gitanyag sa tibuok burukrasya sa city hall ang libreng alot ug hilot, medical & dental services, pagpanghatag og tambal, libreng kapon, purga ug bakuna sa mga binuhing hayop, pag-apod-apod og seedlings ug uban pa.

 

Mapasalamaton usab si Mayor Klarex sa mga nasudnong kagamhanan sama sa Philhealth Region 10, Taskforce Oro, Cagayan de Oro City Police Office, Bureau of Jail Management & Penology, Bureau of Fire Protection, Philippine Statistics Authority, Philippine Coast Guard ug uban pang mga organisasyon sa pagduyog ug pagtanyag usab sa ilang tagsa-tagsa ka mga serbisyo.

 

Nagpasalamat usab kini sa kadagkoan sa Balubal Elementary School sa pagpagamit sa tunghaan isip venue sa kalihokan ug sa mga magtutudlo sa aktibong partisipasyon sa dance competition.

 

Malaumon si Mayor Rolando ‘Klarex’ Uy nga sa iyang ikaduhang termino, mas daghan pa ang maalagaran sa 'Klarex nga Serbisyo sa Baryo' sa tinguha nga mapaduol ang gobyerno sa katawhan ug ang katawhan duol sa gobyerno. (AGP/Photos by Joanne Abejo/CIO)