GISUGDAN na ni Mayor Klarex Uy ang pagdala sa People’s Day sa Brgy Tagpangi, adlaw’ng Lunes, Hulyo 14 ning tuig ug kini dad-on usab sa ubang barangay sa mosunod nga mga Lunes.

 

Atol sa People’s Day nakadawat og libreng duha ka kilo nga bugas ang katawhan gikan sa City Social Welfare and Development Department (CSWD), libreng check-up sa City Health Office, libreng tambal sa City Health Insurance Office, pagkuha og birth certificate sa City Civil Registry, pagbayad sa business permit sa Business Permit Licensing Division ug uban pa.

 

Sa laing bahin, gipasabot ni Mayor Klarex ang iyang katuyoan sa pagdala sa People’s Day sa mga kabarangayan. “Ang People’s Day dad-on na nako sa tanan kabarangayan atol sa pagpakayab sa atong nasudnong bandila kay nakita nako dili tanan mga katawhan sa kabarangayan labi na ang mga kaigsuonan nga naa nahimutang sa layo nga kabukiran makaadto sa People’s Day sa city hall aron madawat, mahatagan og kahigayonan nga maserbisyohan. Gidala nato sa barangay aron mabati, ug makita nga ang katawhan duol sa gobyerno ug gituyo nato nga ang People’s Day uban sa akong mga kauban sa pinili ra sa’b nga department managers,” saysay ni Mayor Klarex Uy.

 

Gipasalamatan usab ni Mayor Klarex ang barangay council sa Barangay Tagpangi pinangunahan ni Punong Barangay Chenet Marianas sa pag-abiabi sa city hall.

 

Gawas ni Mayor Klarex, misalmot usab sa People’s Day si City Councilor Moreno ‘Jing’ Daba IV, City Councilor Juancho ‘Antuy’ Roa-Pascual ug City City Councilor Al Legaspi Sr.

 

Ang People’s Day sa ikaduhang termino ni Mayor Klarex ipahigayun na matag ikaduha hangtud ikaupat nga Lunes matag bulan sa nagkalainlaing barangay. Kini diretso ipahigayun inig human sa flagraising ceremony sa barangay ug molungtad hangtud 11:30 lamang sa buntag.

 

Nasayrang dala sa People’s Day ang mga batakang serbisyo sa city hall uban sa tumong nga mapadayon ang tinguha ni Mayor Klarex nga mapaduol ang serbisyo sa gobyerno ngadto sa katawhan. (NLB/CIO/photos by Kim Zaldivar/CIO)