BISAN pa man nga ubos na sa “pink zone” ang status sa Cagayan de Oro sa kaso sa African Swine Fever apan gipahugtan pa gihapon sa administrasyon ni Mayor Rolando `Klarex’ Uy pinaagi sa City Veterinary Office ang pagbantay aron malikayan nga mobalik ang ASF ning syudad.

 

Kini human nanumpa ang bag-ong napili nga City Veterinary Office-Barangay Biosecurity Officers pinangulohan sa presidenti nga si Leo Martin S. Lamberte sa Barangay Puerto.

 

Si Majority Floor Leader City Councilor Edgar Cabanlas ang nag-administer sa pagpanumpa sa mga opisyales nga gikan sa nagkadaiyang barangay atol sa Flag raising ceremony sa city hall adlaw’ng Lunes, Hulyo 14.

 

Gipasabot ni City Veterinarian Dr. Helen Ann Tacandong nga ang tahas sa mga BBOs mao ang pagpatuman sa biosecurity measures, pagpahigayon og surveillance ug monitoring, pagtaho sa mga gidudahang kaso, pagtabang sa pagtubag ug mga paningkamot sa recovery efforts sulod sa ilang barangay ug sa syudad.

 

Samtang gipasabot usab ni Dr. Tacandong nga ubos na sa “pink zone” ang syduad diin pasabot niini wala nay kaso sa ASF apan nahimutang duol sa nataptan nga mga lugar nga nanginahanglan og istrikto nga biosecurity ug surveillance measures aron malikayan ang pagkaylap sa sakit. (ALR/Photos by Reynan Baylin/CIO)