GIHANGYO ni Mayor Klarex Uy ang mga negosyante sa Cagayan de Oro nga magpa-renew sa ilang business permit human gisugdan adlaw’ng Lunes, Enero 5, ang tinuig nga business permit renewal and registration diha sa may Business One-Stop Shop kon BOSS sa City Tourism Hall.

 

Ang hangyo gipadayag ni Mayor Klarex atol sa iyang mensahe sa unang flagraising ceremony sa city hall, Lunes, Enero 5, sanglit kutob lang karong Enero 20 ang tinuig nga business permit renewal.

 

Tungod niini, gilugwayan sa City Finance Department ug Business Permits and Licensing Division (BPLD) ang oras ting-trabaho hangtud ala-7:00 sa gabii, Lunes hangtud Biyernes, aron pagdawat sa mga aplikasyon sa business permit renewal and registration.

 

Samtang abri usab ang BOSS matag adlaw’ng Sabado ug Dominggo, sugod alas-8:00 sa buntag hangtud ala-5:00 sa hapon aron gayud mahatagan og igong panahon ang mga negosyante sa syudad nga maka-renew sa ilang business permit.

 

Sa miaging tuig, dul-an 30,000 ang nagparehistro sa ilang negosyo dinhi sa dakbayan sa Cagayan de Oro. (CIO/Photos by Reynan Baylin)