GIPAHIBALO sa Night Market Management Committee (NMMC) ang temporaryo’ng pagsuspinde sa night market sa Guillermo Street sugod Marso 9 ning tuig human kini nasabutan ug naaprobahan sa gipahigayon nga miting niadtong Pebrero 19.

 

Ang suspensyon maglakip sa bahin sa Guillermo Street gikan sa Hayes Street padulong sa JR Borja Street.

 

Matud sa komitiba, ang maong lakang gihimo tungod sa nagkagrabeng kagubot sa lugar nga miresulta sa paghuot sa trapiko, pagsulod sa mga dili awtorisadong vendors, pagpamaligya gawas sa gitugot nga oras, ug mga dili pagsinabtanay tali sa mga namaligya.

 

Gipadayag usab ni Co-Chairman sa NMMC Atty Egay Uy nga wala pa’y gitakdang petsa alang sa pagbalik sa operasyon sa night market, kay ang panahon sa suspensyon pagagamiton aron magpahigayon og flushing ug halapad nga pagpanglimpyo sa maong dalan. (DYM/Photos by Roel Felicitas/CIO) (Photos credit: Viajero)