GIPATUMAN na dinhi sa Cagayan de Oro ang pagbaligya sa P20 nga kilo sa bugas human kini gipalapdan sa national nga kagamhanan aron mas daghan pa nga pamilya ang makapahimulos.

 

Kini nga bugas mapalit diha sa Baloy Barangay Tablon pinaagi sa Food Terminal Inc. (FTI) diin ang National Food Authority (NFA-10) ang supplier sa maong bugas.

 

Ang mga kwalipikadong benepisyaryo mao ang mga senior citizen, solo parent, person with disability (PWD), 4Ps, rice farmer, mangingisda, jeepney ug tricycle drivers.

 

Ang mga benepisyaryo magdala sa gikinahanglan nga dokumento sama sa senior citizen ID gikan sa OSCA, solo parent ID gikan sa Social Welfare and Development Office, PWD ID gika nsa Persons with Disability Affairs Office, 4Ps ID o certification gikan sa DSWD, RSBSA ID kung mga rice farmers; fisherfolk ID o certification gikan sa BFAR kung mga mangingisda, driver’s ID gikan sa LTFRB o franchise-based ID nga gi-endorso sa lokal nga transport cooperative kung jeepney drivers, samtang tricycle operator’s permit ug driver’s ID gikan sa LGU kung tricycle drivers.

 

Gikabutyag nga 10kls matag semana o maximum sa 30klos sa usa ka bulan ang mapalit sa mga benepisyaryo gawas lamang sa mga rice farmers nga adunay RSBSA ID kay usa ka sako nga bugas matag bulan ang ilang mapalit.

 

Alayon niini, gidapit ang mga kuwalipikadong benepisyaryo nga moadto lang sa buhatan sa NFA Misamis Oriental sa Baloy Barangay Tablon aron makapalit sa barato nga bugas. (ALR/CIO/Photos NFA-MISOR)