Sobra 20,000 ka mga negosyante sa Cagayan de Oro ang nakalukat na sa ilang business permit sukad Enero 5 hangtud Pebrero 20 ning tuig.

 

Kini ang gitaho ni Oxanna S. Custodio, Business Permits and Licensing Division (BPLD) acting head, atol sa tigom, Pebrero 26 nga gidumala ni Mr. John Asuncion, ang presiding officer sa Events Management Team for Business Registration 2026.

 

Sa maong panahon, gibutyag ni Ms. Custodio nga mokabat sa 20,604 ang milukat og business permit human gisugdan niadtong Enero 5 ang business permit renewal diha sa Business One-Stop Shop (BOSS) sa City Tourism Hall.

 

Naglaum si Custodio nga mosaka pa ang maong ihap sa nagparehistro sa ilang negosyo, sanglit gilugwayan sa kagamhanan ning syudad ang business permit renewal hangtud Marso 31 ning tuig.

 

Nag-una sa Top 5 industry classification mao ang wholesale and retail trade (9,947), ug kini gisundan sa accommodation and food service (2,191), real estate (1,532), manufacturing (1,148) ug financial and insurance (1,033).

 

Samtang ang nag-una sa Top 5 barangays with business registrants mao ang barangay Carmen (2,534), ug gisundan dayon sa barangay Kauswagan (1,356), Bulua (1,026), Lapasan (830) ug Barangay 24 (739). (CIO)