TALIWALA sa kusog nga ulan, walay pagduhaduha nga serbisyo ang gipa-abot ni Mayor Klarex Uy sa Barangay Tumpagon, adlaw’ng Huwebes, Pebrero 26 pinaagi sa People’s Day.

 

Gani, dakong kalipay sa mga molupyo niini ilabina ni Barangay Tumpagon Punong Barangay Cecilio Dagsaan nga miabot ang serbisyo sa city hall bisan pa man sa kalayo sa ilang lugar.

 

Lakip sa batakang serbisyo nga gidala sa Peoples Day ang libreng check-up, tambal, wheelchair ug pagtubag sa inquiry kabahin sa scholarship, job application, late birth registration, renewal of business permit ug uban pa.

 

Naghatag usab og libreng lollipop alang sa mga gagmay’ng kabataan ug lima ka kilo nga bugas sa mga hamtong diin personal kini nga donasyon sa pamilya ni Mayor Klarex Uy.

 

Ang People’s Day ning adlawa usa ka pruweba sa tinud-anay nga serbisyo ni Mayor Klarex aron mapabati lamang ang serbisyo sa gobyerno ngadto sa katawhan ilabina sa mga kabarangayan nga anaa nahimutang sa kabukiran. (NLB/photos by Jhoanne Abejo/CIO)