MAPASALAMATON si City Councilor George Christopher Goking kinsa chairperson sa Committee on Trade and Commerce uban ni Mayor Rolando Klarex Uy, human giaprubahan ang ilang hangyo sa Oro Port Cargo Handling Services, Inc. ug Philippine Port Authority (PPA) Region X nga mahatagan og prayoridad ang mga cargo vessel nga nagdala og bugas sa pag-dunggo ning syudad.

 

Nasayrang aduna’y taas nga linya sa “queue for docking” sa Macabalan Port sa mga miaging adlaw nunot sa pag-ulan nga mao’y hinungdan sa kalangan ug ang rason nga dili madiskarga ang mga mahinungdanon nga mga produkto sama sa bugas kung aduna’y kusog nga ulan.

 

Gani, mapasalamaton si City Councilor Goking ug Mayor Klarex kang Sonny Sebellino - Head of Operations sa Oro Port Handling Services Inc, Kirk Lumayag - PPA Port Harbor Master, Arnold De La Cruz sa Bureau of Plant Industry sa abtik nga pagresponde, ingon man kang Kathy Marohombsar - Grain Supervisor sa National Food Authority ug Danny Magbanua - Rice Retailer sa Cogon Market sa pag-accommodate sa ilang hangyo. (NLB/CIO/photos courtesy of CMO and Office of City Councilor George Goking)