MIDAWAT og P3,000 monthly assistance ang 278 teenage mothers ning syudad nga beneficiaries sa ProtectTEEN program sa Department of Social Welfare and Development Region 10, Pebrero 24-26.

 

Ang ProtectTEEN program nag-promote sa pagkunhod sa teenage pregnancy sa mga barangay inubanan sa paghatag og giya sa mga teenage mother nga mobalik og tungha, pagkat-on sa pag-amuma sa ilang mga anak, pagplano sa “birth spacing” sa pagpanganak ug ubang pagtulon-an para makakat-on sa “mature” nga paghunahuna alang sa ilang hayag nga kaugmaon.

 

Mahinumdoman nga milagda si Mayor Klarex Uy, City Social Welfare and Development (CSWD) Department Head Annie Tongson uban ang buhatan sa Community Improvement Division sa pagpangulo ni Honorio Diputado Jr. sa usa ka Memorandum of Agreement (MOA) kauban sa DSWD Region X alang sa pag-implementar sa maong programa, niadtong Disyembre 2, 2025.

 

Nasayrang sulod sa maong MOA, 278 ka matumbok sa CSWD ug CID nga mga teenage mothers ang mopailawum sa sessions matag bulan sulod sa ka duha tuig diin ang mga teenage mothers usab gikinahanglan nga dili ma-buros sulod sa duha ka tuig ug mopadayun og skwela samtang mipailawum sa mga session. (NLB/CIO/photos courtesy of CSWD)