MOKABAT sa 738 ka Kagay-anon ang nakapahimulos sa 24/7 Mental Helpline sa City Social Welfare and Development (CSWD) Department Psychosocial Unit sa tuig 2025.

 

Gawas niini, 15 ka emergency runs ang gitubag usab sa CSWD Psychosocial Unit nga anaa na sa risgo sa suicide ug self-harm.

 

Kini kasagarang nahimo uban sa tabang sa City Disaster Risk Reduction Management Department, mga barangay diin diin nahitabo ang suicide attempt, CSWD-Oro Response and Processing Center ug Cagayan de Oro City Police Office.

 

Ang Mental Helpline matawagan 24/7 niining tulo ka numero: 0970-039-2709 (TNT), 0975-608-7522 (TM) ug 09052033510 (TM).

 

Sumala ni City Psychologist Rio Rosal Baliling, ang 24/7 Mental Helpline usa ka first response aron mapaminaw, mahatagan og suporta, ug matabangan ang usa ka indibidwal sa panahon nga kini nakasinati sa mental health crisis.

 

Dugang ni Baliling, anaa’y mga panahon nga gikinahanglan ang padayon nga follow-up pinaagi sa padayon pa nga pakig-istorya, therapy sessions, ug dugang nga psychosocial interventions, depende sa panginahanglanon sa kliyente.

 

Manginahangalan usab kini sa tabang ug pag-atiman gikan sa pamilya, amigo/amiga, ka-trabaho ug komunidad ingon man kini usa ka “shared responsibility.” (NLB/CIO/data courtesy of CSWD Psychosocial Unit)