MUABOT sa 435 ka mga qualified senior citizens sa Cagayan de Oro ang gikatakdang modawat sa ilang cash gift kon ayuda gikan sa nasudnong kagamhanan karong adlawa, Pebrero 27.

 

Kini pinaagi usab sa National Commission on Senior Citizens (NCSC) subay sa programang Expanded Centenarian Act pinasikad sa Republic Act 11982.

 

Ang nasangpit nga pay-out gipangunahan mismo ni NCSC 10 Regional Director Mary Jean H. Asum uban sa suporta sa City Social Welfare and Development - Office for Senior Citizens Affairs (OSCA).

 

Sigon sa Expanded Centenarian Act, matag senior citizen nga makatung-tong sa untop 80, 85, 90, ug 95 anyos ang makadawat og tag 10,000 pesos isip pahalipay sa gobyerno sa kontribusyon sa mga katigulangan sa ilang komunidad.

 

Alang sa dugang kasayuran mahitungod sa programa ug mga rekisitos, mahimong mobisita sa buhatan sa OSCA nga nahimutang sa Barangay 40. (AGP/Photos by Iren Fuentes/CIO)