NASAKMIT sa City Central School ang kadaugan sa unang hugna sa 'Klarex nga Serbisyo sa Baryo (KSB) Inter-School Dance Competition' (Teachers’ Category) alang sa tuig 2025 nga gipangulohan ni Mayor Rolando 'Klarex' Uy.

 

Gideklarar ang mga mananaog ni Dr. Roy Angelo Gazo, Schools Division Superintendent sa Department of Education-Cagayan de Oro Division, atol sa regular nga monthly management committee meeting, adlaw'ng Martes, Marso 3 ning tuig.

 

Ang City Central School maoy napiling kampeon ug gisundan sa Cugman Elementary School isip 2nd placer, samtang ang Bonbon National High School maoy nakakuha sa 3rd place.

 

Ang maong kompetisyon gipahigayon matag KSB, diin ipahigayon ang maong kalihokan, didto usab magpasundayag ang mga magtutudlo sa ilang talento sa sayaw.

 

Basi sa criteria sa maong kompetisyon, 40 percent sa performance, 30 percent sa choreography, 15 percent sa costume ug music, ug 15 percent alang sa entertainment ug 'wow' factor, nga adunay kinatibuk-ang 100 percent.

 

Ang presentation mahimong comical skit, sayaw nga adunay kanta, o kombinasyon sa nagkalain-laing estilo sa pasundayag.

 

Ang gidugayon sa presentasyon kinahanglan dili moubos sa upat (4) ka minuto ug dili molapas sa unom (6) ka minuto. Adunay automatic nga duha (2) ka puntos nga ibawas kon adunay paglapas sa gitakdang oras.

 

Sumala ni Mayor Klarex, ang kampeon makadawat og cash prize nga P300,000, samtang ang 2nd placer makadawat og P200,000 ug ang 3rd placer makadawat og P100,000. (MDS/CIO/Photo by: Kim Zaldivar/Nathan Galleros, CIO)