Duha ka mga miyembro sa grupo sa lechoneros ning syudad ang adunay kalapasan human nakit-an nga padayon gihapon nga nag-stocking og baboy nga litsonon sulod sa iyang tugkaran atol sa pagsusi sa Joint Inspection Team, Huwebes, Marso 5, 2026.

 

Ang Joint Inspection Team nga gipangulohan sa City Veterinary Office misusi sa 20 ka mga lechon house dapit sa Rio de Oro Boulevard, partiKular na diha sa Barangay 5, 13, 15, ug Barangay Consolacion.

 

Gibutyag ni Dr. Darryl Rasay, assistant dep’t manager sa City Veterinary Office, nga sa uwahing meeting sa Joint Inspection Team ug sa hugpong sa mga lechoneros niadtong Enero, gihatagan sila og 45 ka adlaw nga ma-pull out ang ilang mga stock nga litsonong baboy diha sa ilang tugkaran.

 

Nahuman ang 45 ka adlaw niadtong Marso 1, apan sa pagsusi sa team niadtong adlaw’ng Huwebes, duha ka mga lechoneros ang wala misunod sa kasabutan.

 

Gipasabot sa team nga hugot nga gidili ang pagbuhi og baboy ingon man ang swine stocking operation sa mga negosyante og lechon sulod sa residential ug commercial zone area.

 

Gidili usab ang pag-ihaw diha sa ilang tugkaran o sa bisan asa nga lugar nga wala gitugot. Kinahanglan sa slaughter house nila ipaihaw ang ilang mga baboy.

 

Samtang gihatagan og ultimatum sa team ang duha ka lechoneros aron hingpit nilang ibalhin gikan sa ilang tugkaran ang stock nga litsonong baboy diin mobalik ang team karong adlawa, Biyernes Marso 6 aron subling susihon kon gi-pull out na nila ang mga baboy.

 

Si Atty. Jose Edgardo Uy, co-chairman sa RCB nga kauban sa JIT, namahayag nga isyuhan og notice of violation ang maong mga lechoneros kung anaa pa gihapon ang ilang mga baboy litsonon.

 

Ang kauban sa JIT naglakip sa City Health Office (CHO), City Environment and Natural Resources Office (CLENRO), City Planning and Development Office (CPDO), Business Permit and Licensing Division (BPLD), Regulatory Compliant Board (RCB), Roads and Traffic Administration (RTA), ug Cagayan de Oro City Police Office (Cocpo). (ALR/CIO/Photos by Reynan Baylin/CIO)