GIBANSAY sa kagamhanang lokal sa Cagayan de Oro pinaagi sa City Disaster Risk Reduction and Management Council (CDRRMC) ang 40 ka mga kawani sa city hall nga mayorya gilangkoban sa CDRRMD, aduna usab personahe gikan sa City Health Office, City Information Office, City Mayor's Office, City Social Welfare and Development Office, JR Borja General Hospital, sa 3-day Basic Incident Command System Course (BICS), Marso 4-7, 2026.

 

Aktibo usab nga misalmot sa BICS si Department of the Interior and Local Government - CDO City Director Elaine Josephine Depaur.

 

Laraw sa maong training nga masabtan sa mga participante ang mga batakang prinsipyo, istruktura, ug papel sa Incident Command System sa pagtimon sa unsa mang disaster scenario ug dagkong kalihokan sa syudad pinaagi sa hugot nga koordinasyon sa matag buhatan.

 

Lakip gitun-an sa maong kurso ang pagsagop sa ICS isip ‘response management concept’ nga magsiguro sa kaluwasan ug seguridad sa publiko ug responders. (AGP/Photo by CDRRMD)