ALAYON sa kasaulogan sa Rabies Awareness Month matag Marso, magpahigayon og sunod-sunod nga high density anti-rabies vaccination ang City Veterinary Office diha sa Barangay Carmen sugod karong adlawa Marso 10 hangtud sa Marso 11, 13, 16, 17, ug 18.

 

Gipasabot ni City Veterinarian Dr. Helen Ann Tacandong nga lahi-lahi nga lugar sa Barangay Carmen himoon ang anti-rabies vaccination aron masiguro nga mapabakunahan sa mga pet owners ang ilang mga binuhing iro ug iring.

 

Nunot niini, gidasig ni Dr. Tacandong ang mga pet owners sa Barangay Carmen nga pahimuslan kini nga higayon diin anaa na sa ilang tugkaran ang pagbakuna sa ilang mga iro ug iring.

 

Ang kampanya batok rabies maoy usa sa mga priority nga health program sa administrasyon ni Mayor Rolando `Klarex’ Uy aron masiguro nga luwas dili lang ang katawhan lakip na usab ang mga binuhi nga iro ug iring.

 

Tinguha usab ni Mayor Klarex nga mahimong rabies-free ang Cagayan de Oro hinungdan nga gihingusgan sa City Veterinay Office ang pagpatuman sa high density anti-rabies vaccination ilabina sa mga dagkong barangay ning syudad. (ALR/CIO/Infog from City Vet)