PORMAL nga gitunol sa kagamhanang lokal pinangulohan ni Mayor Rolando 'Klarex' Uy ang duha ka covered courts nga nahimutang sa Taglimao Elementary School ug Taglimao National High School, adlaw'ng Miyerkules, Abril 1 ning tuig.

 

Ang covered court sa Taglimao Elementary School nagkantidad og P4,110,000, samtang ang sa Taglimao National High School nagkantidad og P4,170,000.

 

Ang duha ka proyekto kompleto na sa drainage ug electrical works, ug kompleto sa suga ug uban pang pasilidad.

 

Kinasingkasing nga gitunol ni Mayor Klarex ang mga proyekto ug miingon, 'Dili nako ihikaw ang akong tabang ug ang akong kaya nga ihatag nga proyekto sa maong barangay, ilabina kung kini makahatag og dakong kaayuhan sa mga magtutungha ug residente.'

 

Mapasalamaton usab si school principal Rowel Caiña sa Taglimao Elementary School ug Marilou Lagac sa Taglimao National High School sa maong covered courts nga magamit sa mga estudyante ug komunidad kung gikinahanglan.

 

Gidugang pa ni Caina nga magamit na puhon ang ilang covered court para sa mga sports activities sa tunghaan sama sa volleyball, basketball, badminton, ug uban pang kalihukan sa komunidad.

 

Samtang, gibutyag ni Mayor Klarex ang laraw nga magpahimutang og stage sa covered court sa Taglimao Elementary School aron aduna nay tukmang pasilidad nga magamit sa ilang mga aktibidades. (MDS/CIO/Photos by: Jomar Figuracion/CIO)