Gibanabana nga anaa sa 1,354 registered motorela drivers ning syudad ang makadawat og fuel subsidy gikan sa national nga pangagamhanan pinaagi sa Department of Social Welfare and Development (DSWD-10) karong bulan sa Abril 2026.

 

Kini nga ihap sa mga benepisyaryo basi sa listahan gikan sa Roads and Traffic Administration (RTA) kay sila man ang adunay record sa mga rehistradong motorela drivers ug unit sa na-renew nga mga motorela.

 

Gibutyag ni Ynan Tagod, Head sa Traffic Education, Policy and Information Division sa RTA nga mokabat 1,700 registered rela drivers ang ilang gisumiter ngadto sa DSWD.

 

Ug kini nga mga benepisyaryo gikuha gikan sa Abril 20, 2025 paingon sa Marso 26, 2026 nga talaan sa narehistro nga mga motorela ilabina nga duha lamang ka adlaw ang gihatag nga deadline sa DSWD.

 

Apan gibalik sa DSWD ang maong listahan ug gipausab kay kulang og personal information ang nalista nga mga drivers sama sa birthday ug wala na-spell out ang mga middle name.

 

Dugang ni Tagod nga gihimo nila ang tanan pagkontak sa mga drivers ug operators apan pipila lamang ang nitubag samtang ang uban dili na makontak ang mga number sa cellphone.

 

Gani, niadtong adlaw’ng Sabado ug Dominggo Marso 28 ug 29 nagtinabangay ang mga personahi sa RTA ug City Social Welfare and Development Department sa pagtrabaho ug makumpleto ang mga data nga gipangayo sa DSWD.

 

Ug basi sa uwahing talaan ug kumpleto nga data niadtong Marso 29, 2026, nga nasumiter sa RTA ug CSWD ngadto sa DSWD mokabat 1,354 ang posibleng benepisyaryo.

 

Samtang subling giklaro sa RTA ug CSWD nga dili gikan sa panudlanan sa syudad ang fuel subsidy apan gikan sa national government. (ALR/CIO/Photos from RTA)