Gi-APROBAHAN sa 21st City Council ang Proposed Resolution No. 2026-203 nga nagdeklara sa syudad sa Cagayan de Oro ubos sa 'State of Energy Emergency' atol sa espesyal nga sesyon sa konseho, adlaw'ng Martes, Abril 7, ning tuig.

 

Kini human giduso sa City Disaster Risk Reduction and Management Council (DRRMC) ang maong resolution human sa gipahigayong panagtagbo adlaw’ng Lunes, Abril 6, sa mga sakop niini.

 

Dumdoman niadtong Marso 31, pinaagi sa Executive Order ni Mayor Rolando 'Klarex' Uy, namugna ang Energy Crisis Committee diin gihisgotan niini ang mga posibleng lakang sa pagtubag sa epekto sa krisis sa lana.

 

Ang mga benepisyaryo niini mao ang mga transport groups, farmers, fisherfolks, senior citizens, persons with disabilities (PWDs), solo parents, ug uban pa.

 

Ang deklarasyon sa State of Energy Emergency magtugot sa lokal nga kagamhan sa pagpatuman sa husto, tukma, ug koordinadong mga lakang aron matubag ang mga risgo nga dala sa kalibutanong kakulang sa enerhiya.

 

Gi-siguro usab sa konseho nga pinaagi sa pag-aprobar niini makahimo na gilayon pg emergency crisis plan ang executive department aron masiguro ang patas nga pagbahin sa pondo sa syudad. (MDS/CIO/Photos by: Jomar Figuracion/CIO)