MIDUYOG ang kagamhanang lokal sa Cagayan de Oro ubos sa administrasyon ni City Mayor Rolando 'Klarex' Uy, kauban ang 4th Infantry Division Philippine Army, Philippine Veterans Affairs Office , nagkadaiyang nasudnong ahensya, barangay, ug uban pang sektor sa pagsaulog sa ika-84 nga sumad sa Araw ng Kagitingan, karong adlawa, Abril 9, 2026 diha sa Kiosko Kagawasan Park, Divisoria.

 

Subay sa tema, 'Giting ng Bayani, Pamana ng Salinlahi' gihandom ang kaisog ug makinasudnon sa katawhang Pilipino sa kasaysayan sa pakigbisog ug panaghiusa batok sa mga mananakop.

 

Gisugdan ang programa sa pagpakayab sa nasudnong bandila, executive wreath laying pinangulohan ni 21st City Council Majority Floor Leader Atty. Edgar S. Cabanlas ug ni Major General Michelle B. Anayron Jr, ang 54th Commander sa 4th ID Philippine Army, paghalad sa 21 Gun Salute sa armadong kusog, ug pagpasalida sa documentary video sa PVAO mahitungod sa paghandom sa Bataan Death March.

 

Gipahigayon usab sa uniformed personnel sa pagpangulo sa 4th ID PA ang 'freedom march' nga nanukad sa Rio de Oro Boulevard padulong sa Kiosko Kagawasan Plaza Divisoria ug gisalmotan 4th ID band, College ROTC, Philippine Army Reservist, PVAO, Armed Forces of the Philippines, Philippine National Police, 8th Air Reserve Center, Naval Reserve Center, Bureau of Fire Protection ug uban pang mga national government agencies.

 

Ning adlaw sa pagtamod sa ika-84 nga kasumaran sa Araw ng Kagitingan, atong gihandom ang mabayanihong tampo ug sakripisyo sa armadong kusog, mga beterano, ug sa katibuk-ang katawhang Pilipino nga nakigbisog alang sa nasudnong kagawasan. (AGP/Photos by Roel Felicitas/CIO)