MALAMPUSONG gipahigayon sa City Management Information Systems and Innovation Department (CMISID) ang Basic Computer Literacy Training alang sa mga opisyales ug kawani sa Barangay 34 niadtong Huwebes, Abril 23 ning tuig, aron mapalambo ang ilang kahibalo sa teknolohiya.

 

Pinaagi sa Administrative and Training Division sa CMISID, napalig-on ang kahibalo sa mga partisipante sa basic computer operations aron mas sakto, haom ug paspas ang pagtubag sa serbisyo sa publiko.

 

Sa maong training, lakip sa gihisgutan ang mga parte sa computer set-up, operating system, basic applications, basic cybersecurity, ug hands-on nga aktibidad gamit ang MS Word.

 

Ang maong training nagtumong sa paghatag og lig-on nga pundasyon sa pagamit og computer, sama sa Microsoft Office, file management, ug husto nga pagamit sa online platforms.

 

Pinaagi niini, importante nga makat-onan kini sa mga kawani sa barangay aron mapadali ug mapahapsay ang serbisyo ngadto sa katawhan, ilabi na karon nga nagkadaghan ang digital nga transaksyon. (DYM/CIO/Photo courtesy to CMISID)