MALIPAYON ang 2,487 ka mga residente gikan sa Barangay Lumbia sa mga batakang serbisyo nga ilang natagamtaman sa 'Kuyog Ta sa Serbisyo sa Baryo' (KSB) nga pinangulohan ni Mayor Rolando 'Klarex' Uy, adlaw'ng Sabado, Mayo 2, 2026.

 

Kini na ang ika-tulo'ng hugna sa KSB sa maong barangay, ug gipadayag ni Punong Barangay Hon. Alexander Torralba ang iyang kalipay nga nasinati na usab nila ang mga serbisyong gidala sa KSB gikan sa City Hall padulong sa katawhan.

 

Usa sa mga highlights nga programa sa KSB mao ang 'Kasalan ng Bayan,' diin 73 ka magtiayon ang nahiusa ug gikasal ni Mayor Klarex. Kadaghanan kanila gikan sa Barangay Lumbia, samtang adunay pipila usab gikan sa Barangay Besigan.

 

Mapasalamaton ang mga bag-ong kinasal sa mga regalo nga ilang nadawat gikan sa pamilya Uy ug sa pipila ka konsehal sa dakbayan. Lakip sa ilang nadawat ang usa ka buok lechon, cake, wine, bugas, ug uban pang mga dugang regalo.

 

Lakip usab sa mga serbisyong gitanyag ang libre nga check-up sa mata, libre nga ibot sa ngipon, tuli, health consultations, ug libreng tambal.

 

Kinse (15) usab ka benepisyaryo gikan sa Patpat Farmers Association ang nakadawat og 20 ka sako sa coconut fertilizer, duha ka water drums, usa ka pressure sprayer, ug 10 ka seedling trays.

 

Gihatagan usab og libreng residential patent titles ang pito ka benepisyaryo gikan sa Barangay Lumbia atol sa turnover sa mga titulo nga gipahigayon sa lokal nga kagamhanan. (MDS/CIO/Photos by: Iren Fuentes & Jhoanne Abjejo/CIO)