GIPASIDUNGGAN sa lokal nga kagamhanan, pinangulohan ni Mayor Rolando 'Klarex' Uy, ang mga estudyanteng nakasungkit og unom ka medalya sa National School Press Conference 2026 niadtong Abril 17 sa Ormoc City.

 

Gihimo kini atol sa flag-raising ceremony sa City Hall, uban ang mga miyembro sa 21st City Council, mga department managers, ug mga kawani sa lokal nga kagamhanan, adlaw'ng Lunes, Mayo 4, ning tuig, sa City Hall Quadrangle.

 

Tungod niini malipayon si Mayor Klarex nga aduna’y mga talentadong student journalists sa syudad nga mipakita og talagsaong kahanas atol sa NSPC 2026.

 

Sa kinatibuk-an, unom ka medalya ang nasungkit sa Cagayan de Oro, usa ka gold medal sa editorial cartooning, tulo ka silver medals sa Copy Editing and Headline Writing, pagsulat og Lathalain, ug pagsulat og kolum, ug usa ka bronze medal sa Science and Technology writing.

 

Dugang pa, nakadaog usab ang syudad og special award pinaagi sa pag-angkon og silver medal sa radio broadcasting (Filipino) sa elementary nga level.

 

Gipadayag ni Mayor Klarex ang iyang padayon nga suporta ug pagpasidungog sa tanang mananaog sa NSPC 2026. (MDS/Photos by Reynan Baylin/CIO)