KOMPLETO ug walay kakulang ang P250 milyon nga trust fund sa syudad.

Kini ang gibutyag ni Councilor Yan Lam Kim, chairman sa Committee on Finance, Budget and Appropriations, atol sa iyang special report sa regular session sa konseho sa milabay'ng semana.

Nasayran nga ang P250 milyon nga budget gitagana alang sa pagtukod og multi-purpose building ubos sa national budget pinaagi sa Aid to Local Government Units (ALGU), ug gisugyot nga igahin na lamang isip dugang pondo alang sa New City Hall Complex imbis nga magtukod og laing pasilidad.

Bisan pa niini, hapit na molapas og duha ka tuig ang maong pundo apan wala pa kini mapatuman tungod sa mga isyu sa land acquisition alang sa New City Hall.

Mao kini ang nag-unang rason nganong wala pa masugdi ang proyekto, nga maoy hinungdan usab sa mga pangutana sa DILG kalabot sa termino sa implementasyon niini.

Kahinumdoman nga adunay mga panutana ug isyu nga mitumaw sa social media nga nagamit na ang maong pundo apan gipatin-aw kini nga kompleto ug wala kini gigamit.

Sumala ni Konsehal Lim, personal niyang gituki kauban ang City Finance Office aron masiguro ang kahimtang sa pondo.
Dugang pa, gisusi usab niini ang Land Bank of the Philippines, diin gikumpirma nga ‘intact’ gihapon ang kantidad ug misaka pa gani kini sa kapin P300 milyon.

Kini gipamatud-an pinaagi sa certification gikan sa City Finance ug Landbank nga nagpakita nga adunay kapin P300 milyon nga deposito.

Busa, giawhag ni Konsehal Lim ang katawhan nga magmatngon ug mohimo og due diligence sa pag-verify sa mga balita, ilabi na kadtong makita sa social media diin adunay presensya sa mga troll accounts.

Gihangyo usab niya ang mga media partners nga magpadayon sa maampingong ug patas nga pagbalita aron malikayan ang sayop nga impormasyon sa publiko human niini gipakita ang Landbank certification isip pagmatuod. (MDS/Photos by: Jomar Figuracion/CIO)