GARBO ug kalipay ni Mayor Klare Uy kauban ang kagamhanang lokal, ang pagtunol sa bag-ong covered court ngadto sa Baikingon Elementary School, adlaw'ng Huwebes, Mayo 7, ning tuig, sa Barangay Baikingon.

 

Ang maong covered court nagkantidad ug balor P10.3 milyon diin kompleto na ug pasilidad sama sa stage, bleachers, ramp ug railings alang sa Persons with Disabilities (PWDs), separado nga dressing room para sa lalaki ug babaye, ug kompleto usab sa electrical wirings ug suga.

 

Dako ang pasalamat ni Punong Barangay Ronello 'Jao' Gumapac sa maong proyekto tungod kay dakong tabang kini alang sa mga kabatan-onan ug estudyante sa barangay.

 

Sumala ni City Engineer Joel Momongan, ang covered court gidisenyo dili lamang alang sa mga kalihokan sa eskwelahan, kondili mahimo usab kining evacuation center alang sa mga residente sa Barangay Baikingon panahon sa kalamidad.

 

Malipayon usab nga midawat sa maong proyekto si Baikingon Elementary School Principal Elsa Tahud.

 

Matud niya, dili na kinahanglan nga manghulam pa sila og covered court sa barangay tungod kay aduna na silay kaugalingong pasilidad alang sa mga programa ug aktibidad sa eskwelahan.

 

Sa iyang panapos nga mensahe, gibutyag ni Mayor Klarex nga ang maong covered court usa sa iyang natuman nga saad alang sa mga lumolupyo sa Barangay Baikingon ug aron mapadayon ang physical classes sa mga bata sa panahon nga init o ulan.

 

Gipaabot usab sa eskwelahan nga ampingan ug gamiton sa hustong paagi ang covered court aron magpadayon kini nga mahimong lugar sa pagkat-on, kalipay, ug kalampusan alang sa umaabot pang mga henerasyon. (MDS/CIO/Photos by: Jhoanne Abejo & Aerial Shots by: Kim Zaldivar/CIO)