HUMAN sa gipahigayon nga piniliay sa mga opisyales sa mga vendors sa Cogon Market, gibag-o usab niini ang pangalan nga mao ang Cogon Central Market Vendors Association (COCEMVA) nga kanhi Cogon United Market Vendors Association (CUMVA).

 

Pinangulohan sa bag-ong napili nga presidente nga si Joe Louie Marsamolo, ang mga opisyales nanumpa kang Mayor Rolando `Klarex’ Uy bag-ohay lang uban sa presensya ni Atty. Marianne G. Ragas, department manager sa City Economic Enterprises and Business Development Administration (CEEBDA).

 

Alayon niini, gihangyo ni Mayor Klarex ang mga opisyales nga magtinabangay ug maghiusa alang sa kahusay ug kalambuan sa Cogon market uban ang pasalig nga andam mohatag ang syudad og dugang pundo alang sa asosasyon aron masiguro ang dali nga paglambo.

 

Malaumon usab si Atty. Ragas nga mas tunhay na ang pagpatuman sa mga programa ug proyekto sa maong merkado ug mapalambo ang maayo nga relasyon sa pagdumala niini pinaagi sa bag-ong mga opisyales.

 

Samtang mipaabot sa iyang pasalamat si Marsamolo ngadto kang Mayor Klarex sa hugot nga pagsuporta sa ilang asosasyon, ingon man sa CEEBDA sa pagdumala sa patas nga piniliay. Siya usab mipasalig nga sila maningkamot nga matuman ang gipanumpaang katungdanan.

(ALR/CIO/Photos from CEEBDA)