PORMAL nang gidawat sa lokal nga kagamhanan ang pagturn-over sa mga road lots, open spaces, ug common areas sa South Point 1 Subdivision sa Upper Palalan, Barangay Lumbia gikan sa Liberty Land Corporation, usa ka subdivision developer.

 

Nahitabo kini atol sa regular session sa konseho diin giaprubahan ang ordinansa nga nagtugot kang Mayor Rolando 'Klarex' Uy sa pagpirma sa deed of donation.

 

Pinaagi niini, opisyal nang mahimong responsibilidad sa lokal nga kagamhanan ang pagdumala ug pagmintinar sa maong mga pampublikong luna.

 

Ubos sa balaod, ang pag-donar og luna alang sa publiko gimando diin ang mga subdivision developer gikinahanglan nga magreserba og bahin sa ilang yuta alang sa open spaces ug, human makompleto ang proyekto, idonar kini sa Local Government Unit (LGU) alang sa kaayohan sa publiko.

 

Base sa mga report ug Certificate of Completion nga gi-isyu sa City Housing and Urban Development Department (CHUDD) ug sa City Engineer’s Office, natul-id na sa developer ang mga namatikdang kakulangan, ug ang kasamtangang mga pasilidad ug kahimanan nahiuyon sa giaprobahang plano. (MDS/CIO/Photos by: Jomar Figuracion/CIO)