MALAMPUSONG mitapos sa ilang Reserve Officers’ Training Corps (ROTC) ubos sa Philippine Air Force ang 112 ka mga cadet sa City College of Cagayan de Oro (CCCDO) adlaw’ng Huwebes, Mayo 21 ning tuig.

 

Kini mao ang pinakaunang batch sa ROTC cadets sa CCCDO diin lakip kini ka college-based military program nga nagtumong sa pag-andam sa mga estudyante aron mahimong mga reservist ug mga opisyal sa armadong pwersa sa umaabot nga mga katuigan.

 

Kabahin usab kini sa National Service Training Program (NSTP), diin gihiusa ang edukasyon, military training, ug leadership development.

 

Uban sa tema nga 'Resilient Youth, Ready Nation: Leading with Service, Discipline and Stewardship,' gitumong sa City College of Cagayan de Oro, sa pagpangulo ni College President Dr Jestoni Babia, ang paghulma og mga batan-ong disiplinado, responsable, ug andam moalagad sa nasud.

 

Lakip sa maong seremonya ang presentation of candidates, declaration of graduates, paghatag sa mga sertipiko, ug pagpasidungog sa mga outstanding cadets pinaagi sa awards.

 

Nanguna usab sa graduation rites si kanhi konsehal ug PAF Reservist Capt. George G. Goking sa oath-taking ug acceptance ceremony sa mga bag-ong reservist sa Philippine Air Force.

 

Sa iyang mensahe isip keynote speaker, gipasabot ni Dr. Babia ang importansya sa disiplina ug patriotismo alang sa nasud.

 

Gitapos ang seremonya sa exit of colors diin miuli usab ang mga estudyante nga adunay bitbit nga garbo ug kalipay nga ilang nahuman ang maong programa. (MDS/Photos Roel Felicitas/CIO)