MABUNGAHON nga gipahigayon sa City College of Cagayan de Oro ang ikaduhang National Service Training Program (NSTP) Badging ug Completion Ceremony, adlaw'ng Huwebes, Mayo 21 sa City Tourism Hall.

 

Sa duha ka component sa NSTP sa City College, adunay 42 ka completers sa Literacy Training Service (LTS) ug 83 ka completers sa Civic Welfare Training Service (CWTS), nga adunay kinatibuk-ang 125 ka estudyante nga mitambong sa maong seremonya.

 

Atol sa programa, gipahigayon usab ang awarding ceremony alang sa mga completers. Lakip sa mga gihatag nga pasidungog ang Outstanding NSTP Student Award, Most Active Volunteers Award, Spirit of Volunteerism Award, ug Best in NSTP Group Project Innovation and Execution Award.

 

Misaksi si Councilor Moreno 'Amajing-Jing' Daba IV, chairperson sa Committee on Education sa City Council, sa mga estudyante ug naghatag og mensahe sa pagdasig.

 

'Kanunay ninyo hinumdumi nga ang inyong henerasyon adunay gahum sa pagserbisyo nga makahatag og positibong epekto sa kinabuhi sa katawhan ug sa komunidad,' sa iyang mensahe.

 

Human niini, nanumpa ang mga estudyante isip kabahin sa National Service Reserve Corps pinaagi sa oath of incorporation nga gipangulohan sa usa sa mga student completers.

 

Pormal usab nga gidawat ni Antonio Sugarol ang mga completers ug naghatag og mensahe alang kanila.

 

Gitapos ang NSTP Badging ug Completion Ceremony uban sa pagdala sa mga estudyante sa mga mithi ug leksyon nga ilang nakat-onan gikan sa programa, ilabina ang disiplina ug civic responsibility. (MDS/Photos by Jomar Figuracion/CIO)