LIBRENG check-up, tambal, libreng tuli, hilot, ug libreng pagparehistro sa mga birth certificate ug uban pang batakang serbisyo, maoy gidala sa tibuok burukrasya sa City Hall pinangulohan ni Mayor Rolando 'Klarex' Uy ngadto sa mga residente sa Barangay Bugo pinaagi sa 'Kuyog Ta sa Serbisyo sa Baryo' (KSB), adlaw’ng Sabado, Mayo 23 ning tuig.

 

Kini ang ikatulong hugna sa KSB sa maong barangay, ug malipayon nga midawat sa mga serbisyo si Punong Barangay Spencer Cailing.

 

Mapasalamaton siya nga nahatagan ang ilang barangay og kahigayonan nga makatagamtam usab sa mga batakang serbisyo pinaagi sa KSB, diin adunay 1,841 ka mga residente ang nakabenepisyo niini.

 

Usab, 81 ka mga couples ang gikasal ni Mayor Klarex pinaagi sa iyang 'Kasalan ng Bayan,' usa sa mga highlight nga programa sa maong KSB.

 

Malipayon nga mibitbit ang mga bag-ong kasal sa mga regalong ilang nadawat gikan sa pamilya Uy. Ang matag magtiayon nakadawat og usa ka tibuok lechon, bugas, cake, ug wine.

 

Aduna usab 1,009 ka mga benepisyaryo gikan sa Barangay Baikingon nga nakadawat sa ilang Member Data Record (MDR), nga giturn-over sa City Health Insurance Office, City Health Office, ug PhilHealth Region 10.

 

Mitunol usab ang Agricultural and Productivity Operations Office (APOO) og agrifisheries inputs, lakip ang usa ka kahon sa hook, duha ka rolyo sa line no. 4, duha ka rolyo sa line no. 6, ug usa ka 200-liter nga drum.

 

Pipila usab ka native chicken ang gitunol sa City Veterinary Office ngadto sa mga benepisyaryo sa Barangay Bugo aron ilang padak-on ug padaghanon. Sa higayon nga modaghan na kini, ang gidaghanon sa ilang nadawat gikan sa animal dispersal program mao usab ang ilang ibalik sa City Veterinary Office.(MDS/CIO/Photos by: Harry Tibon/CMO)