Dakong garbo ug dungog ang naangkon ni Cagayan de Oro City boxing pride Carlo Paalam human nasungkit ang gold medal sa Eindhoven Box Cup 2026 didto sa nasud sa The Netherlands.

 

Gipukan ni Tokyo Olympic boxing silver medalist Carlo Paalam ang kontra sa finals sa men’s 55-kilogram category nga si Abdul-Rahman Burton sa England atol sa katapusang adlaw sa maong torneyo, Lunes, Mayo 25.

 

Dako ang kalipay ug pasalamat ni Cagayan de Oro City amateur boxing team head coach Elmer Pamisa, usa sa mga coach sa RP national boxing team nga naggiya sa pagbansay ug preparasyon sa mga boksidor nga misalmot sa maong kompetisyon.

 

Gipasalamatan usab ni coach Pamisa ang suporta sa local nga kagamhanan ning syudad ubos sa administrasyon ni Mayor Rolando ‘Klarex’ Uy, ug naglaum kini nga ang kalampusan nga nakab-ot ni Paalam magsilbing inspirasyon sa mga batan-ong boksidor sa dakbayan sa Cagayan de Oro.

 

Si Paalam usa sa mga malampusong produkto sa Cagayan de Oro City amateur boxing team human nadiskubre ni coach Pamisa ang talagsaong talento niini sa natad sa boksing sa sayong panuigon. (CIO/photo & video clip by coach Pamisa)