NAGPAHIGAYON ang City Health Office (CHO) pinaagi sa ilang Health Education and Promotion Unit (HEPU) ug Family Health Advocacy Home Partner Class sa Barangay Canitoan niadtong Mayo 20, 2026.

 

Ang maong kalihokan nagtumong sa paghatag og kahibalo ug kahanas sa mga indibidwal aron mahimong epektibong tigpasiugda sa kahimsog sa ilang pamilya.

 

Subay usab kini sa tinguha sa lokal nga kagamhanan ubos sa administrasyon ni Mayor Rolando 'Klarex' Uy nga mapalig-on ang adbokasiya sa panglawas sugod mismo sa panimalay.

 

Daghang mga partisipante ang mitambong sa maong programa diin ilang nakat-onan ang hustong nutrisyon, preventive care, mga prinsipyo sa Universal Health Care (UHC), ug ang pagpalambo sa pito ka himsog nga kinaeiya alang sa mas maayong panglawas.

 

Gitumbok usab sa maong kalihokan ang hustong pamaagi sa pagdumala sa health care system, epektibong pakig-communicate sa mga health care provider, ug paghimo og insaktong desisyon bahin sa panglawas.

 

Human sa maong pagbansay, pagatawgon nga `health communicators’ ang mga partisipante nga makakumpleto sa klase ug makagradwar diin sila ang maghatag og impormasyon ug edukasyon sa panglawas ngadto sa ilang mga pamilya ug komunidad.

 

Matud sa City Health Office, ang maong programa gituyo kay ang pamilya maoy batakang pundasyon sa katilingban, busa importante nga diha magsugod ang hustong impormasyon ug kahibalo kabahin sa health awareness.(MDS/CIO/Photos Courtesy to HEPU-CHO)