GIPASIDUNGGAN sa lokal nga kagamhanan si Hillary Kaye Abbott, usa ka 2nd Dan Black Belter sa Taekwondo, atol sa flag-raising ceremony isip pag-ila sa iyang talagsaong kalampusan sa natad sa sports.

 

Dakong garbo ug kalipay ni Mayor Rolando 'Klarex' Uy sa mga nahimo ni Abbott, ilabina sa iyang pagkwalipika alang sa Palarong Pambansa 2026 nga gipahigayon sa Agusan del Sur.

 

Misugod ang karera ni Abbott sa taekwondo niadtong 2016 sa dihang miapil siya sa usa ka torneyo sa Ozamiz City diin nakadaog siya og gold medal.

 

Sukad niadto, mas nadasig siya sa pagpadayon sa maong dula pinaagi sa iyang determinasyon, disiplina, ug kakugi.

 

Padayon siyang miapil sa nagkalain-laing kompetisyon sama sa District Meet, Division Meet, Regional Meet, Batang Pinoy, ug Palarong Pampook.

 

Ang iyang walay hunong nga pagpangandam ug pagpaningkamot maoy nakatabang kaniya aron makakuwalipika sa Palarong Pambansa 2026.

 

Gawas sa iyang mga medalya ug kadaugan, gititulohan usab si Abbott isip 2nd Dan Black Belt ug adunay Kukkiwon Certification, usa ka internasyonal nga pag-ila nga gihatag sa Kukkiwon, ang World Taekwondo Headquarters sa South Korea. Kini nga sertipikasyon nagpamatuod sa iyang ka-maayo ug kwalipikasyon isip usa ka taekwondo practitioner.

 

Ang kalampusan ni Abbott usa ka inspirasyon sa kabatan-onan ug usa ka dakong garbo dili lamang sa iyang pamilya kondili usab sa tibuok siyudad. (MDS/CIO/Photos by: Reynan Baylin/CIO)