NAKIGTIMBAYAYONG ang Department of Education (DepEd)–Division of Cagayan de Oro sa lokal nga kagamhanan ning syudad sa pagpahigayon og kick-off program sa Brigada Eskwela 2026, Martes, Hunyo 2, sa Balubal Elementary School.

 

Ang maong kalihokan kabahin sa hiniusang paningkamot sa lokal nga kagamhanan ubos sa liderato ni Mayor Rolando 'Klarex' Uy ug sa DepEd-Cagayan de Oro aron masiguro ang luwas, limpyo, ug maayong palibot sa mga tunghaan sa pagsugod sa bag-ong tuig sa pagtuon.

 

Atol sa programa, giturn-over usab ang nagkalainlaing school supplies alang sa mga kabataan, lakip na ang mga notebook, papel, lapis, ballpen, eraser, ug uban pang gamit sa eskwelahan.

 

Gihatag usab ang mga pintal, cleaning equipments ug uban pang kagamitan nga magamit sa pag-ayo ug pagpatahom sa mga classroom nga nanginahanglan og repainting isip kabahin sa mga kalihokan sa Brigada Eskwela.

 

Gipadayag sa lokal nga kagamhanan ang padayon ug lig-on nga suporta niini sa maong inisyatiba tungod kay nahiuyon kini sa tumong ni Mayor Klarex alang sa kalidad nga edukasyon ug ang kaayohan sa mga kabatan-onan.

 

Kabahin usab sa programa ang ceremonial signing of the Pledge of Commitment nga gipangulohan ni DepEd Regional Director Ruth Fuentes, uban ni City Administrator Atty. Roy Hilario Raagas, Schools Division Superintendent Dr. Roy Angelo E. Gazo, Councilor Gilda 'Gigi' Go, mga kawani sa DepEd, ug uban pang mga partisipante.

 

Dumdoman nga gisugdan ang Brigada Eskwela 2026 kick-off niadtong Mayo 25 sa Pigsag-an Mobile School.

 

Gisundan kini sa Macabalan Elementary School ug Kibanog Mobile School niadtong Mayo 2, Patag National High School niadtong Mayo 27, Magayad Integrated School niadtong Mayo 28, ug sa Camaman-an Elementary School, Macapaya Extension School, ug City Central School niadtong Mayo 29. (MDS/CIO/Photos by: Nathan Galleros/CIO)