MALAMPUSON nga gitak-opan ang Capacity-Building Training may kalabot sa Cash Management and Control System (CMCS) ug Commission On Audit (COA) Compliance alang sa Bonded Officers, adlaw'ng Miyerkules, Hunyo 3 ning tuig.

 

Nasayran nga nagsugod ang Capacity-Building Training niadtong Lunes, Hunyo 1, diin gitambongan kini sa mga bonded officers sa City Hall. Gipailawom sila sa pagbansay ug hands-on activities nga naglangkob sa Accountability, Responsibility, and Liability pinangulohan ni State Auditor V. Marilou C. Mampao; Receipts & Collections gigiyahan ni State Audtior IV Atty. Sittie Salma L. Gurar; Disbursement of Funds ug Rules on Cash Advances nga gipangunahan ni State Auditor IV Sheila C Edrozo.

 

Sa unang sesyon, gituki ang mahinungdanong tahas sa bonded officers sa pagdumala ug pagpanalipod sa pondo sa gobyerno. Gisundan kini sa diskusyon bahin sa hustong proseso sa pagpagawas sa kwarta ug pagbaton og ensaktong rekord sa transaksiyon. Sa kataposang bahin, gipatin-aw ang lagda sa Cash Advance Rules aron masiguro ang tukmang paggamit, husto nga liquidation, ug klarong accountability sa tanang pondo nga gi-advance.

 

Mipadayag si Acting City Accountant Atty. Kirsten Kate F. Calvo, CPA sa iyang pagpasalamat kang City Mayor Rolando Klarex Uy alang sa pag-invest sa maong 3-day Capacity-Building training ngadto sa mga Accountable Officers (AO) ug City Hall officials alang sa mas malungtaron ug epektibo nga serbisyo publiko. (LRM/CIO Photos by Jomar Figuracion/CIO)