MAPASALAMATON ang mga residente sa Barangay Besigan ug mga kasikbit nga dapit sa libreng serbisyo gikan sa lokal nga kagamhanan ubos sa administrasyon ni Mayor Rolando “Klarex” Uy human gipahigayon ang “Kuyug ta sa Serbisyo sa Baryo” (KSB) sa Besigan Elementary School, adlawng Sabado, Hunyo 20 ning tuiga.

 

Gidala ngadto sa pinakalayong barangay sa dakbayan ang mga nag-unang serbisyo sa gobyerno sama sa libreng medical check-up, tambal, alot, tuli, ug hilot.

 

Gawas niini, gitanyag usab ang mga tabang alang sa agrikultura, panginabuhian ug ang pagproseso sa mga nagkadaiyang ID ug opisyal nga papeles.

 

Lakip sa mga natunol mao ang Member Data Records (MDR) alang sa 146 ka mga benepisyaryo, ug mga opisyal nga birth certificate ngadto sa 123 ka mga residente. Nag apod-apod usab ang City Veterinary Office ug mga free-range nga manok ug baka ngadto sa lima ka mga residente, samtang mga ekipo sa irigasyon ang gihatag sa Agricultural Productivity and Operations Office (APOO) sa mga mag-uuma.

 

Gitambongan ang maong kalihokan sa mga dagkong opisyal sa dakbayan sa pagpanguna ni City Administrator Atty. Roy Hilario Raagas, Office of the City Mayor Chief of Staff Sheila B. Lumbatan, ug DepEd Cagayan de Oro Schools Division Superintendent Dr. Roy Angelo Gazo, uban sa mga opisyal sa Brgy. Besigan nga gipangulohan ni Brgy. Captain Samuel Minister.

 

Usa sa mga mipatigbabaw nga highlight sa programa mao ang sorpresang pag-anunsyo ug pag-hire ni Dr. Gazo kang Marchanlie S. Tantuhan, usa ka Licensed Professional Teacher (LPT) ug lumad nga migradwar sa Besigan, aron mamahimong bag-ong magtutudlo sa Kiugta Mobile School.

 

Aron maghatag og kabibo sa maong adlaw, mipasundayag usab ang mga estudyante ug magtutudlo gikan sa Besigan Elementary School, Besigan National High School, ug Guro Dancers gikan sa DepEd Cagayan de Oro Division.

 

Ang kalampusan sa KSB nagpalig-on sa tinguha sa kagamhanang lokal sa dakbayan nga mapaduol ang serbisyo sa gobyerno ngadto sa matag Kagay-anon, ilabi na sa mga hilit nga dapit sama sa Brgy. Besigan, ang pinakalayong barangay sa Cagayan de Oro. (ACE/CIO Photos by Harry Tibon/CMO)