GILUSAD sa lokal nga kagamhanan, pinaagi sa Local School Board (LSB), sa pakigtambayayong sa Department of Education (DepEd)-Division of Cagayan de Oro, ang Academic Recovery and Accessible Learning (ARAL) Tutor Program adlaw’ng Lunes, Agosto 24, sa Cagayan de Oro National High School-Senior High School.

 

Ang ARAL Program gitumong sa pagsulbad sa mga learning gaps nga nasinati sa mga estudyante tungod sa mga higayon nga wala sila makatambong sa klase o tungod sa kakulang sa kahibalo ug kahanas.

 

Pinaagi niini, gigamit ang pondo sa lokal nga kagamhanan aron mag-hire ug mag-deploy og mga ARAL tutor nga motabang sa mga estudyante nga nanginahanglan og dugang nga suporta sa Pagbasa, Matematika, ug Siyensya, ilabina sa mga estudyante gikan sa Grades 1 hangtod 10.

 

Ang pagpatuman sa programa nagsunod sa DepEd Memorandum No. 001, s. 2026, nga naglatid sa mga pamaagi sa pag-hire sa mga ARAL tutor ug support staff sa mga eskwelahan.

 

Ang mga ARAL tutor naka-focus lamang sa pagtudlo, pag-monitor sa kalamboan sa mga estudyante, ug paghatag og remediation o dugang nga pagtudlo.

 

Ang lokal nga kagamhanan nga gipangulohan ni Mayor Rolando ‘Klarex’ Uy, pinaagi sa Local School Board (LSB) nga gipangulohan ni Dr. Alicia Anghay, nagsilbing financial ug administrative partner sa pagpatuman sa DepEd ARAL Program sa lebel sa siyudad.

 

Samtang ang DepEd maoy nagdumala sa curriculum ug sa pag-ila sa mga estudyanteng target sa programa, ang LSB nagsiguro nga adunay igong lokal nga resources aron hapsay nga mapadayon ang programa. (MDS/CIO/Photos by: Iren Fuentes/CIO)