NASAKMIT sa Barangay Agusan ang titulo isip Grand Champion sa gipahigayon nga Higalaay Streetdancing Dancing Competition 2026, adlaw’ng Myerkules, Agosto 26, nga gipahigayon sa Don Gregorio Pelaez Sports Complex.

 

Luyo’g-luyo ang kadaugan sa Brgy Agusan human pulos nagkampyon sa Street Dancing nga adunay cash prize nga 50,000, diin nanukad sa Limketkai Drive ug sa Grand Showdown nga adunay cash prize nga mokabat sa 500,000 nga gihimo sa Sports Complex.

 

Naangkon usab niini ang mga Special Awards sa Best in Musicality ug Best Choreography nga adunay tag P20,000 nga cash prize.

 

Nahimong 2nd placer ang Barangay Bugo ug 3rd placer usab Barangay 17 sa Street Dancing.

 

Sa Grand Showdown, midaog isip 2nd placer ang Barangay Carmen, ug 3rd placer ang Barangay 17.

 

Naangkon sa Barangay Carmen ang Best in Costume ug Best in Production Design.

 

Samtang nahimong Best in Storyline ang Barangay 17.

 

Gawas sa madawatan nga mga cash prizes aduna usab gihatag nga cash grant si Mayor Rolando 'Klarex' Uy, nga tag 200,000 matag contingents sa Higalaay Streetdancing Competition nga gilangkoban sa Barangay Bulua, Barangay 17, Dansolihon, Carmen, Bugo, Agusan ug Macabalan.

 

Ang Higalaay Streetdancing Dancing Competition usa sa mga core events sa Higalaay Festival nga naghulagway sa kasaysayan sa dakbayan, tradisyon, kultura, pagtuo ug sugilanon sa panaghigalaay.

 

Pinaagi ni Ms. Sheila Lumbatan, ang co-chair sa Higalaay Festival Committee, gipadangat ni Mayor Klarex ang iyang dakong pasalamat sa matag Kagay-anon ingon man sa mga dumuduong sa pagsalmot ug pakighiusa sa pagsaulog sa kapistahan sa Patron sa Cagayan de Oro - Senyor San Agustin.

 

Nagpasalamat usab kini sa mga Punong Barangay, City Tourism and Cultural Affairs Office, mga lumilihok, mga sponsors , civic organizations, partner agencies and companies, ug daghan pang uban alang sa kalamposan sa maong kalihokan. (AGP/Photos by Jhoanne Abejo, Kim Zaldivar/Reynan Baylin/CIO)