NASAKMIT sa Misamis Oriental General Comprehensive High School (MOGCHS) ang pagka-overall champion sa Higalaay Marching Band Competition 2026, adlaw’ng Huwebes, Agosto 27, ning tuig sa Limketkai Grounds.

 

Nakuha usab sa Liceo de Cagayan University ang 1st runner-up, samtang ang Tumpagon National High School ang 2nd runner-up.

 

Ang overall champion nakadawat og P100,000 cash prize, trophy, dummy check, ug P50,000 worth of products gikan sa Pocari Sweat. Ang 1st runner-up nakadawat og P75,000 cash prize, trophy ug dummy check, samtang ang 2nd runner-up nakadawat og P50,000 cash prize, trophy ug dummy check.

 

Nakab-ot usab sa MOGCHS ang titulo nga Best Band Majorette, samtang ang Tumpagon National High School maoy nakadaog isip Best Band Major. Ang matag mananaog nakadawat og P5,000 cash prize ug trophy.

 

Samtang, ginganlan usab ang Liceo de Cagayan University isip Best in Costume, diin nakadawat kini og P5,000 cash prize ug trophy.

 

Ang Top 5 Bands nakadawat usab og P10,000 cash prize matag usa. Kini sila ang Oro Marching Arts Guild, Carmen National High School, Soka Gakkai International Philippines, Bulua National High School, ug Balulang National High School.

 

Kapin 200 ka grupo sa mga partisipante usab ang nilangkob sa Higalaay Civic-Military Parade and Marching Band Competition 2026, diin 35 niini ang competing contingents.

 

Aduna usab float parade, diin apil sa mga misakay ang mga Top 5 finalists sa Miss CDO 2026.

 

Nagmalampuson ang maong kalihukan isip usa sa mga core events sa Higalaay Festival 2026. Taliwala sa init nga panahon, nagpadayon ang parada ug ang pagpakitang-gilas sa mga marching band contingents nga mipartisipar sa maong kompetisyon. (MDS/CIO/Photos by: Reynan Baylin and Jhoanne Abejo/CIO, Harry Tibon/CMO)