NAGTIGI ang kapin 500 ka mga swimming athletes gikan sa nagkalain-laing dapit sa Mindanao sa gipahigayong first-ever Higalaay Swimming Festival, adlaw’ng Sabado, Agosto 29, sa Kagay-an Lawndale Spring Resort.

 

Kini nga kalihokan kabahin sa Higalaay Festival 2026 ug gi-organisa sa lokal nga kagamahanan sa Cagayan de Oro, sa pakigtambayayong sa inilang swimming team organization sa dakbayan, ang Let’s Swim CDO.

 

Adunay tulo ka mga kategorya ang maong swimming competition, 6 years old and under, single age band (7-16), ug 17 years old and above.

 

Ang single age band nagpasabot nga ang mga atleta nga nag-edad og 7 hangtod 16 anyos gibahin sumala sa ilang saktong edad aron patas ang kompetisyon tali sa mga manlalangoy nga parehas og edad.

 

Miapil sa maong kompetisyon ang 29 ka mga swimming teams nga nagpakitang-gilas sa ilang katulin ug abilidad sa paglangoy.

 

Kapin 500 ka mga atleta gikan sa nagkalain-laing teams ang nagtigi alang sa mga ganti ug pag-ila isip mga mananaog.

 

Ang mga mananaog nga teams pagasukdon base sa total points nga makuha sa ilang mga atleta sa nagkalain-laing events.

 

Ang first place makadawat og P30,000 nga cash prize ug mga medalya, samtang P20,000 ug mga medalya alang sa second place ug P15,000 alang sa third place.

 

Ang maong kalihokan kabahin sa mga sports event nga gipalambo ni Mayor Rolando ‘Klarex’ Uy, isip kabahin sa iyang tumong nga mapalambo ang lain-laing klase sa sports ug makahatag og higayon sa mga kagay-anon.

 

Daghan pang mga sports event ang gipahigayon isip kabahin sa Higalaay Festival 2026, lakip na ang Higalaay Pickleball, Volleyball, E-Sports Fest, ug ang Higalaay Swimming Festival. Sa Domingo, Agosto 30, ipahigayon usab ang first-ever Higalaay Dancesport Competition. (MDS/CIO/Photos by: Iren Fuentes/CIO)