KINASING-KASING nga nagpasalamat si City Mayor Rolando 'Klarex' Uy sa tanang mga nagpaluyo sa luwas, malinawon ug malampusong pagpahigayon sa mga kalihokan sa Higalaay Festival 2026 sa tibuok bulan sa Agosto, agig pahinungod sa kasaulogan sa kapistahan sa Mahal nga Patron sa Cagayan de Oro - Sr. San Agustin.

 

Giluwatan ang pamahayag ni Mayor Klarex atol sa flagraising ceremony karong adlawa, Septiyembre 1, 2026 atol sa sinemanang pagpakayab sa nasudnong bandila sa city hall quadrangle.

 

Nagpasalamat si Mayor Klarex sa Labaw'ng Makagagahom sa malampuson nga kapistahan taliwala sa hagit sa panahon, kainit ug pagbundak sa ulan.

 

Nag-unang gipasalamatan sa Mayor ang 4th Intrantry Division Philippine Army, Police Regional Office 10, Taskforce Oro, Cagayan de Oro City Police Office, Bureau of Fire Protection, Philippine Coastguard, ug uban pang mga uniformed personnel, ingon man ang tanan naglangkob sa City Disaster Risk Reduction and Management Council - Incident Management Team.

 

Nagpasalamat usab kini sa tibuok burukrasya sa city hall, 21st City Council ubos sa pagdumala ni Vice Mayor Jocelyn 'Bebot' Rodriguez, mga Punong Barangay, katawhan, sponsors, mga partisipante ug organizers sa nagkadaiyang core, major ug parallel activities.

 

Nanghinaot ang mayor nga magpadayon ang suporta, panaghi-usa ug panaghigalaay sa dakbayan taliwala nga natapos na ang mga aktibidad sa kapistahan. (AGP/Photos by Reynan Baylin/CIO)